नोकरी लागली म्हणून चैन करू नका; खर्चाचे नियोजन करा

आजकाल कॉलेजचे शिक्षण सुरू असताना पार्ट टाईम जॉब करणार्‍यांची संख्याही अधिक आहे. त्याच बरोबर कॉलेजचे शिक्षण पूर्ण झाल्याबरोबर नोकरी लागावी असाही अनेकांचा प्रयत्न असतो. मात्र, एकदा नोकरी लागली आणि हातात पैसा खेळू लागला की, बचतीपेक्षा चैनीवर बरेच पैसे उडवण्याकडे अनेकांचा कल असतो. पण असं करून चालण्यासारखं नाही. गरज नसताना ते खर्च करणे घातक ठरू शकतं. प्रयत्न केला तर खर्च कमी करु शकता. कसे वाचवायचे पैसे?

 दिवसभराच्या छोट्या खर्चांची नोंद ठेवा. चहाच्या कपापासून सुरूवात करा. दिवसभरात कशाकशावर खर्च करता हे जाणून घ्या. घरी जाण्यासाठी खाजगी टॅक्सीचा वापर किती वेळा करता हे तपासा. मनोरंजनासाठी होणार्‍या खर्चाचा विचार करा. पिकनिकला जाण्यासाठी किंवा छंद जोपासण्यासाठी होणार्‍या खर्चाचा ठेवा. भविष्यात गाडी, घर घ्यायचं किंवा पुढच्या शिक्षणासाठी कर्ज घ्यायचं तर स्वत:चं क्रेडिट प्रोफाइल तयार करा. सुरूवातीला एखादं क्रेडिट कार्ड घ्या. वैयक्तिक कर्जही घेता येईल. कर्जाचे हप्ते तसंच क्रेडिट कार्डाचे हप्ते वेळेत भरा. यामुळे सिबिल स्कोअर वाढेल आणि कर्ज सुलभपणे मिळू शकेल. आर्थिक विषयांबद्दल माहिती घ्या. तुमचं ज्ञान वाढवा. गुंतवणूक कशी करायची, किती करायची याबाबत जाणून घ्या. त्याचा फायदा होईल.

आयुष्यात पुढे जायचे असेल तर चांगल्या लोकांचा सहवास ठेवा

तुम्हाला तुमच्या आयुष्यात आणि करिअरमध्ये यशस्वी व्हायचे असेल, तर सर्वप्रथम तुम्हाला तुमच्या संगतीचा विचार करावा लागेल. एखाद्या व्यक्तीचे विचार आणि वर्तन मुख्यत्वे अशा लोकांवर अवलंबून असते, ज्यांच्यासोबत ते आपला अधिक वेळ घालवतात. जर तुम्ही अशा लोकांसोबत राहत असाल ज्यांना सर्वत्र नकारात्मकता दिसते किंवा ज्यांची विचारसरणी खूपच छोटी आहे, आणि जे मोठे स्वप्न पाहण्यास घाबरतात, अशा लोकांच्या सानिध्याने तुम्ही कधीच तुमच्या इच्छित ध्येयापर्यंत पोहोचू शकणार नाही.  कारण संगतीच्या विचारसरणीचा तुमच्या विचारांवरही परिणाम होतो. म्हणूनच शक्य तितक्या लवकर नकारात्मक विचारधारा असलेल्या लोकांची सांगत  सोडा आणि सकारात्मक विचारांच्या लोकांशी मैत्री करायला सुरुवात करा.

त्याचप्रमाणे, तुम्हाला तुमच्या सवयी आणि वागणे याकडेही बारकाईने पाहा. तुमचा सर्वाधिक वेळ कोणत्या गोष्टींसाठी जातो आणि त्याचा तुम्हाला तुमचे ध्येय गाठण्यासाठी उपयोग होतो का ते पहा. तुमच्या दिवसाचा मोठा भाग हकनाक वाया जात असेल तर त्याबाबत चिंतन करा. आणि यानंतर हळूहळू या सवयी आणि वर्तन आटोक्यात आणण्याचा प्रयत्न करा. सतत प्रयत्न केल्याने तुमच्या या सवयी हळूहळू संपुष्टात येतील आणि तुमच्या यशाचा ग्राफदेखील अनेक पटींनी वाढेल. याशिवाय कोणतेही काम पुढे ढकलले जाऊ नये, ज्या त्या वेळी जे ते काम झाले पाहिजे, याकडे कटाक्ष ठेवा. वेळ वाया घालवून चालणार नाही, याची कल्पना आपणा सर्वांना आहे. आजचे काम आजच करा, ते उद्यावर टाकू नका. कामाची टाळाटाळ करून तुम्ही स्वतःची फसवणूक करता, जेव्हा तुम्हाला माहित असते की तुम्हाला आज नाही तर उद्या ते काम करावेच लागणार आहे. तर ते उद्यावर टाकणे थांबवा. नंतर कामाचे ओझे वाढले की मानसिक परिस्थितीदेखील बदलते. विनाकारण ताण यायला लागतो. हे टाळण्यासाठी वेळच्या वेळी काम करत चला.-मच्छिंद्र ऐनापुरे, जत जि. सांगली